1987 Sujet: Sandoz Katastrophe 1996

Der Schutzängel wo duurefliegt

Hett Dioxiin in d Nase griegt.

Är rettet sich vor d Himmelsdiir, was iim dangg Weschtwind glingt.

Und sait zem Petrus: schmeggsch es au, wie’s bis zem Himmel stinggt?

 

1990 Sujet: Die Armeeabschaffungs-Initiative

(Ettingen hat damals als einzige Gemeinde im Kanton BL der Abschaffung zugestimmt)

En Oberscht woont in Ettige

Aber z’Ettige wänn si kai Settige.

Fruschtriert wot är no Bettige - es gfallt em nimm in Ettige,

Doch vo Ettige bis Bettige will niemerts me e Settige.

 

1992 Sujet: Frauenstreik-Tag

Si, an dämm Frytig isch mi Frau

Au an dä Straigg - und sait mer: „tschau!“

Ych ha glettet, gsuugt, Kommisioone gmacht, au abgschtaubt in de Zimmer.

Vom Straigg han ych nit mitbikoo: ...Fir mii isch’s gsii wie immer.

 

.... Apropoo Frauen und dä Straigg,

D’Frau Merian - die us em Daig,

Isch au derbyy mit Häärz und Seel, si het das hailoos gnosse.

Nadyyrligg numme wie sich’s gheert: Sii het Straigge losse.

 

1996 Sujet: Gottesdienst für Tiere in der Elsbethe-Kirche

Mi Katz isch in d’Elsbethe gange,

Der göttligg Sääge go empfange.

Sythäär bättet si Daag und Nacht, kai Muus me lyydet Gwaale,

Und ych darf wiideremool fir d’Katz - mini Kirchestyyre zaale.

 

1997 Sujet: Grenzwerte

Mi Bluetdrugg haut bees oobenuuse,

Au d’Cholesteryynwäärt sin - zem Gruuse!

Mi Puls dä kunnt ins Guinessbuech - dr Lääberewäärt het d’Norm verletzt!

Jetzt goots mer aber wiider guet: Y ha d’Gränzwäärt uffegsetzt.

 

1998 Sujet: Im Wallis schiesst ein Jäger frisch ausgewilderete Bartgeier ab

E Walliser Jäger rieft vergniegt,

wonem e Bartgeier vor si Flinte fliegt:

“Weidmannsheil und Hallalii !“ - voll Fendant und Vergniege,

“Ouu - das isch de hüere güet - dass d’Haase jetzt scho fliege“.

 

2000 Sujet: Der Bundesrat schaut sich gemeinsam die Sonnenfinsternis an

Wo der Ogi denn ändligg au verstoot,

wo d’Sunne bi der Finschterniss e so aanegoot,

sait är: „Y bi immer dert wo d’Sunne schyynt - ai ai ai ai ai,

dert hinterem Mond liggt Kanderstääg und dert bin ych dehai.“

 

2003 Sujet: Alternative medizinische Methoden

Mit Shiatsu, Edelstai und Akkupunktur


und eme Bachblüete-Wörkshop in der freye Natuur,

beglaitet vo Esoterik und Feng Shui, gang ych d’Lääbensfroogen aa;

mit em Erfolg, dass ych jetzt scho ganz elai ...angschtfrey Töpfere kaa.

 

2004 Sujet: die Bundesrätin Micheline Calmy-Ray mit ihrem breiten Lachen

Unseri Micheline vo Bäärn

lacht immer no so brait und gäärn.

Doch luege Si emool genau, y wais nit eb si s gseen?

Die lacht gar nit - im Geegedail - y glaub, die bysst uf d Zeen!

 

2006 Sujet: Der deutsche Kardinal Ratzinger wird Papst

Wo’s im Vatikan bim Papschtroulett

der Benedetto droffe het,


schreye d'Schwoobe: "wir sind Papst!" Jetz goot’s dängg nimme lang,

denn herrscht fir d'Schwyzergarde z’Rom - e Lääderhoosezwang!

 

2006 Sujet: Hochdeutsche Sprache an den Kindergärten

Im Kindergaarte Blääsiring

maint Ain am Hoochdytsch-Häppening:

"Hastu Problem? Was soll das Scheiss? He Mann, ich voll korreckt!"

Im Grund gnoo isch es schaad firs Gäld – dää kaas jo scho perfeggt!

 

2006 Sujet: Stadtbildkommission und der VCS

Wo d'Stadtbild-Komisioon hoochmotiviert

e Baugsuech fir e Mischtkiibel koordiniert,

mien si d'Entschaidig uuseschiebe, denn Aine draait no Runde:

der Delegiert vom VCS – dä het kai Parkblatz gfunde.

 

2006 Sujet: Basel macht Versuch mit Uniformen für die Schüler

Der Erfolg vo dääre Unifoorm

in de Basler Schuele syyg enoorm.

Alli hänn die glyyche Limpe, esoo wirdsch nit verheent

und wenn si speeter Drämmler wärde, no sin si scho dra gweent.

 

2006 Sujet: Doping

Jeede, won e Bitz trainiert,

dä wird uff Doping kontrolliert.

Drum mien au die vom Altersturne in e Gleesli saiche,

s Dumme isch numme, dass die Maischte, s Gleesli nimme braiche.

 

2009 Sujet: Die Schweizer Banken

Bi de Bangge waiss me nie so rächt,

bisch derte Keenig oder Gnächt.

Nur naime kaasch der sicher sy, nämmlig dass dä Disch,

wo si di grad driiberzien, us Mahagoni isch.

 

2010 Sujet: Strassennahmen  (Alt Regierierungsrat Facklam fordert einen Strassennamen für Alt-Bundesrat "Hanspeter Tschudin". Morin damaliger Stadtpräsident.)

Dr Facklam maint: „S wäär nit verkeert,

wenn me verdienti Basler eert.

“Är wott e Hanspi Tschuudi Blatz – das duet mi inspiriere,

zem fir e Morin meegligscht glyy, e Sagggass z reserviere.

 

2010 Sujet: Kontroll-Scanner am Flughafen (Bundesrat Moritz Leuenberger)

Bim Fliege muess jetz sit em Jänner

au der Leuebärger duur e Scänner.

Do mäldet die Maschiine: „der Moritz dä darf mit, 

bi däm kasch luege wie de wotsch - e Bombe isch das nit.“

 

2011 Sujet: Fümoir-Beitzen

E Päärli wo in’s Fümoir goot,

verloot’s denn wider zoobe spoot.

Benääblet hueschte die zwai haim, und speeter denn im Bett,

merggt er, dass er us däm Qualm, die lätz Frau haimgnoo het.

 

2011 Sujet: Burka (Helgen: schwarz)

Dä Helge do, dä stellt ganz glaar

der Blick us eme Auti daar,

wenn aini inere Burka so schreeg no hinde gneisst.

Und jetz waisch au, worum so ebbis doote Winggel heisst.

 

2011 Sujet: Auf dem Grund vom Zürchersee hat man alte Urnen gefunden

Im Ziirisee het me wyt unde,

uf Grund e baar so Urne gfunde.

Ai Heggtygg, will so eppis, däm See doch kennti schaade.

Kasch dännge, dä vertrait sogaar, dass Zircher dinne baade.

 

2012 Sujet: Die  Regierung (BL) will zum sparen das Bottminger Schloss verkaufen

S Weierschloss als Regierigssitz,

der Ballmer zoberscht - dert im Spitz,

die Andere vier im Rittersaal - wäär das nit wunderbaar?

Und ersch denn wird das Schloss verkauft, mit sammt em Inventar.

 

2012 Sujet: der Sexunterricht in den Basler Kindergärten

Dä Sexunterricht im Kindergaarte

kenne d Binggis kuum erwarte.

Nur d Kindergärtnere het Mie, si wird grad dunggelroot.

Do maint der Hansli: „Gän sys miir, ych zaigene wies goot“.

 

2012 Sujet: Autofahren im Alter

Der finfenyynzigjäärig Megge 

losst sich vom Doggter duuretschegge,

eb er no darf Autifaare? „Nadyyrlig“ dailt dä mit,

„und vergässe sy bim uusegoo, der wyssi Stägge nit.“

 

2012 Sujet: Frau Lachenmeier

(Umstrittene Nationalrätin mit teilweise kuriosen oder sonderbaren Anliegen)

Y han e tolle, neie Fäärnsee kauft,

wo sälber luegt, was jetzt grad lauft.

Dä kontrolliert alli Brogramm und macht derbyy nie schlapp,

und wenn d Frau Lachenmeier kunnt, denn stellt dä sälber ab.

 

2012 Sujet: Walk off Spalenberg

(Wessels Regierungsrat und Baudirektor der Stadt)

Wo der Wessels der Spalebärg uff got,

und stolz vor däne Blatte stoot,

sait är: „Ych bi jo au derby, dasch mir nei, verdeggel.“

Do maint Ain schyych: „Das in der Mitti – das sin Dooledeggel.“

 

2014 Sujet: Abhörskandal der NSA (Amerikanischer Gheimdienst)

“Hier Ueli Muurer on the Phone.

Can you hear mi - Herr Spion?

Bitte hänggen si nit uff, mir tut es nämmlig gut,

wenn öbber, wenn ich ammen schwätz, miir auch zuloosen tut.“

 

2014 Sujet: Greenpeace seilt sich am einem Fussballspiel vom Stadiondach ab. (Terzianum Altersresidenz im Stadion)

Der FCB ka nit verstoo,

wie d Greenpeace uff iir Dach ka koo.

Si frooge im Terzianum noch, do sait en alti Tschättere,

zu iirem Maa: „Guschti hesch gheert, sy schutte nimm – sy glättere.“

 

2014 Sujet: Die Zürcher Polizei hat in einem Sex-Club “Dienstleistungen“

                    angenommen.

E Zircher wo in Sex-Club goot,

kunnt, will‘s dumm lauft, in groosi Noot.

Er schreit um Hilfe: „Bolizei – si hänn mer Alles gnoo!“

Do deent‘s vom Zimmer nääbedraa: „Halt s Muul, mer sin scho doo!“

 

2014 Sujet: Hafenkran, ein temporäres Kunstwerk an der Limmat in Zürich

Fir Ziircher isch dä Graane Kunscht

und uff e Schiff wartsch umesunscht.

So Läärläuf sin dert ganz normaal, wenn me d Bewooner kennt. 

Die luege jo au jede Frielig, ob e Schneemaa brennt.

 

2016 Sujet: Insekten essen

Wenn’d Hunger hesch, darfsch nit vergässe,

me kaa jetz au Inseggte ässe.

Määlwüürm, Grille und so Zyyg, doch nimm nie uus Versee,

so Spinner wo “in-Seggte“ sin, das git Ranzewee.

 

2017 Sujet: Tolleranzzone fir “Sexarbeiterinnen“ im Kleinbasel

Fir die wo d Oggsegass bewoone,

git’s quasi sone gschitzti Zoone.

Hett äggscht uff Wunsch vom WWF der Baschi iiber Nacht,

dert e Voogelschutzgebiet fir Drottwaaramsle gmacht?

 

2017 Sujet: E-Bike

Mi Frind het sone “E-Bike“ kauft

und stuunt, wie schnäll dä Geppel lauft.

Und will er nimm ka brämse, duet er mit der Glogge lytte.

S dumme draa isch numme: dä Baum isch nit uf d Sytte.